മിഴിയനക്കങ്ങൾ

എന്നിലേക്ക് ചാഞ്ഞ് ഒരു മരനിഴൽ പോലുമില്ല . തണുതണുത്ത ഒളിവിടങ്ങൾ ഇല്ല . ഉയരങ്ങളിൽ നിന്ന് താഴേയ്ക്ക് കുതിപ്പില്ല . ഇലവീണലിയുന്ന ഉൾവനനീലിമയില്ല . നീർ മോന്തും കുഞ്ഞിമാനുകളുടെ ഉമിനീരെന്നിൽ കലരുന്നില്ല . ശാന്തതയുടെ സൂക്ഷ്മ ലയനത്തിൽ ഞാനൊരിക്കലും ഒഴുക്ക് നിർത്തി ധ്യാനലീനനാവാറില്ല ... ' ഇതെല്ലാമനുഭവിച്ച എൻ്റെ പുഴേ അവസാനമെൻ്റെ അപാരതയിലേയ്ക്ക് നിൻ്റെ വിലയനം ... ശൂന്യതയുടെ ഏകാന്തതയുടെ കൺനോട്ടങ്ങളെത്താത്ത തരിശുനിലങ്ങളെന്നിൽ ... പ്രിയേ ... അലറുന്നുണ്ട് . ഏതോ പ്രേരണയാൽ ഏതുൾവനങ്ങൾ തേടിയാണ് തിരകളായടിച്ചു ചിതറുന്നത് . അഴിമുഖങ്ങളിൽ എനിക്ക് വികാരമൂർച്ഛയുണ്ടാവുന്നു . നിൻ്റെ നനവും കുളിരും പതയും , ഗന്ധവുമെന്നെ വികാരത്തിൻ്റെ പരമ കോടിയിലെത്തിക്കുന്നു ...

ധനുമാസമെത്തിയാദ്യ മഞ്ഞിറക്കം വന്നുവല്ലോ! മാമ്പൂക്കളിനി കൊഴിയുമോ അമ്മതൻ വേവലാതി . തീയിടണം ചുവട്ടിൽ പുകയേൽക്കണമെത്രത്തോളം .. അമ്മതൻ മൃദുസ്വനം പുലരിയിലെ മഞ്ഞിൻ തഴുകൽ പോലോർമ്മയിൽ !! തൊടിയിലാകെ നോക്കി എവിടെ മാവുകൾ !! വെട്ടിമാറ്റിയെല്ലാമിനി എവിടെ പൂക്കാൻ ! വെട്ടിമാറ്റിയെല്ലാം തരിശാക്കി നിലങ്ങളെല്ലാം .. വെട്ടിയൊന്നമ്മയ്ക്ക് വേണ്ടി എരിഞ്ഞമരാൻ ! ഒന്നച്ഛനും പിന്നീടൊരിക്കൽ . കൂറ്റനാമൊന്ന് ഭയമേകി നിന്നു പുരപ്പുറം ചാഞ്ഞെങ്കിലോ !! വെട്ടിയതും,നിർഭയനായി ഞാൻ.. തടിയൊത്ത നാട്ടുമാവ് കൊതിയോടെ ഭാസ്കരേട്ടൻ തരാമൻപതിനായിരം പിടിയഡ്വാൻസായിരം വീണു ഞാനതിൽ പ്രാരാബ്ധക്കാരൻ ... നടവഴി നിരങ്ങി വീണു നാട്ടുമാവും ലോറിയേറിപ്പോയി .. ഇനിയെന്തിൽ പൂക്കാൻ !! മാവെങ്ങിനെയിരിക്കുമപ്പൂപ്പാ കുഞ്ഞിൻ സ്വനം .. ചൂണ്ടിക്കാണിക്കാനാവില്ലല്ലോ മാവില്ലല്ലോയൊരിടത്തും . വരച്ചു ഞാൻ കടലാസിൽ മാവിങ്ങനെ മോനെ .. ഇങ്ങനെ . ചുണ്ടൊന്നു വിങ്ങിയൊരു നീറ്റൽ , അറിഞ്ഞു ഞാൻ ചുന കൊണ്ട് മുറിഞ്ഞ നീറ്റൽ ....

കടവുകളൊഴിഞ്ഞിരിക്കുന്നു . അവസാന ആരവുമായി ദൂരെ പൊട്ടു പോലെയൊരു യാനം ... കൽപ്പടവുകളിൽ ചൂടൊഴിഞ്ഞിട്ടില്ല കൈകോർത്ത് ചേർന്നിരുന്നതിൻ്റെ തരിപ്പിനാൽ കല്ലിനും വിറയലോ ! ഇവനേ .... നീയിരുന്നയിടത്തിൻ്റെ ഒരടയാളം ബാക്കി വെച്ചാണോ നീയാരവങ്ങളിൽ നിന്ന് മടങ്ങിയത് ? സൗഹൃദത്തിൻ്റെ പൂരക്കളി നടന്നതിവിടെയായിരുന്നു ... ഞാനപ്പോൾ നീലനിലാവിൽ തെങ്ങിൻ നിഴൽപ്പാടുകളിൽ ഒരു യക്ഷനായി അലയുകയായിരുന്നു .. പ്രിയനേ ഇവനേ നമ്മുടെ സൗഖ്യ നിമിഷങ്ങളെക്കുറിച്ച് നിൻ്റെ കൂട്ടങ്ങളോട് പറഞ്ഞുവോ ???