ജലക്കവിതകൾ

 

               --1--

ഇന്നലെയും ഇന്നും .... നാളെ !!! ??

ജീവൻ പോവുന്നേരമിറ്റു ജലം

മച്ചിലെ തട്ടിൽ തൂങ്ങും

കുപ്പിയിലെ ഗംഗാജലം .

ജീവൻ പോവുന്നേരമിറ്റു ജലം

കോൺക്രീറ്റ് ഷോക്കേസിലിരിയ്ക്കും

കുപ്പിയിലെന്നോ വറ്റിപ്പോയൊരെൻ

കിണറ്റിൻ ജലം...

                   --2 --

 തർപ്പണം ചെയ്യാൻ

വിറയ്ക്കും കൈകളിൽ

എള്ളുമുണങ്ങിയ ചെറൂളയും

വരണ്ട ചന്ദനവും.

നീരില്ലർപ്പിക്കാനിറ്റും

വരണ്ടൂ തൊണ്ടയും .

പോയൊരാത്മാക്കൾ തൻ

ദാഹമല്ല ചുടുന്നതെൻ സോദരാ

ജനിയ്ക്കാൻ പോവുമെൻ

കുഞ്ഞിനിനിയെങ്ങിനെ നെല്കു--

മിറ്റു ജലം ചേർത്താ വയമ്പ് ...!!

                 --3--

കരയിലിരുന്ന്

പൊടിഞ്ഞമരുമീ

തോണിയിലെഴുതിയിട്ടുണ്ടൊരു

പുഴതൻ ജീവചരിത്രം .....

                   --4--

 കോളക്കമ്പനികൾ

കുഴൽക്കിണറുകൾ

ഭൂമിതന്നപായങ്ങൾ .

കാടുകൾ

വയലുകൾ

പുഴകൾ

ഭൂമിതന്നാധാരങ്ങൾ.

അധാരങ്ങൾ

പണയം വെച്ചും

ചുട്ടെരിച്ചും

അപായങ്ങൾ

പരീക്ഷിച്ച് രുചിയ്ക്കുന്നു ..

             --5--

കാവും

കുളങ്ങളും

നശിപ്പിച്ചുള്ള

പുരോഗമനങ്ങൾ

കൊണ്ടെത്തിച്ചത്

വെള്ളമില്ലായ്മയിലേയ്ക്കാണ് ...

കാവ് തീണ്ടല്ലേ എന്നെത്രയോതി മക്കളേ!