യാത്ര
മൂന്നാറിലേയ്ക്കുള്ള ബസ്സ്
കടന്നു പോയതിന് ശേഷമാണ്
ക്യാൻസർ സെന്ററിലേക്കുള്ള
ബസ്സ് കടന്നു പോയത് .
മെയ് മാസം
വാകപ്പൂക്കൾ
കുലകുലയായി
പൂത്തലഞ്ഞങ്ങിനെ.
പത്തോളം വാകമരങ്ങൾ .
പൂമരം ബസ്റ്റോപ്പിന് ചുറ്റും
ചുവപ്പാർന്ന റോഡ് .
ചുവപ്പരഞ്ഞ്
കറുപ്പിനോടലിയുന്നു .
മറന്നു പോവുന്നു .
ബസ്സുകൾ ...
അതെ..
മൂന്നാർ ബസ്സ് .
എന്തിനോ ...
സ്റ്റോപ്പില്ലാത്തയിവിടെ
ഒന്ന് പതിയെയാക്കി ..
വിടർന്ന മലരുകൾ
പൊടുന്നനെ കൂമ്പും പോലെ
മുഖ കമലങ്ങൾ .
ഒരു കാറ്റൂതി മറയും പോലെ
ബസ്സ് നീങ്ങി .
മുഖ കമലങ്ങൾ വിടർന്നു .
ബസ്സിലൊരു സൂര്യനുദിച്ചു .
തലയാട്ടിച്ചിരിച്ചവർ നീങ്ങി..
പൊടുന്നെനെയൊരു
KSRTC ബസ്സ് വന്നു നിന്നു.
ക്യാൻസർ സെന്ററിലേക്ക് .
മൂകരായി നിന്ന
മൂന്ന് പേർ
സാവധാനം
കയറിപ്പോയി .
കരുവാളിച്ച
അൻപതോളം മുഖങ്ങൾ .
ചിരിയില്ല .
ചിരി മാറുമ്പോൾ
കൂർക്കും മുഖം പോലെ
ശാന്തനിരാസം .
ഇനി വരുന്ന ബസ്സുകളെ
ശ്രദ്ധിക്കേണ്ട .
ഇതിനിടയിലോടുന്നവയാണവ.
ഞാനെന്റെ ജോലി തുടരട്ടെ
വലംകാൽ ചെരുപ്പേ
തുന്നിയുള്ളു .
ഇടം കാൽ തുന്നൽ
ശരിയാക്കണം .
വരുമിപ്പോഴവർ .
ഇടം കാൽ ചെരുപ്പുകളെല്ലാം
ശരിയാക്കണം ..
കാൽവെച്ച്
ശരിയെന്ന് ചൊല്ലുമ്പോൾ
എനിക്കൊരന്നമായി .
ദൂരെയപ്പോഴും
മൂന്നാർ ബസ്സ്
കുതിച്ചോടുന്നു .
അടുത്തെത്തിയെന്ന
ഏതോ ഒരു ഭാവത്തിൽ
ക്യാൻസർ സെന്ററിലെ
ബസ്സിലെ
ആൾക്കാരിറങ്ങുന്നു
Comments
Post a Comment