ലയം

 

ഒരു പാട്ട് കേൾക്കുമ്പോൾ

അത് മൂളി നോക്കുമ്പോൾ

ഒരു രാഗമെന്നിൽ പിടയ്ക്കും.

അവികല്പമാമൊരു ചിന്തയാൽ

നിറനിലാക്കാലമൊന്നോർക്കും

നിലവിട്ടുയർന്നതന്നോർക്കും 

പദസഞ്ചയത്തിൻ്റെ അനുപല്ലവി -

ക്കുള്ളിലൊരു ഭ്രൂണമായി തുടിയ്ക്കും

പ്രളയ പ്രപഞ്ചത്തിലുറങ്ങും 

നിറസാധകത്തിൻ്റെ ചരണപ്പെരുക്ക -

ത്തിലതു ജീവവായുമായ് മാറും

ധ്യാനസ്സമാധി വിട്ടുണരും.

ഒരു തുണ്ടു പല്ലവിതന്നാഴക്കടലിൽ

നിന്നൊരു കുഞ്ഞു മൽസ്യമായുയരും

പുതുചക്രവാളം തേടിയൊഴുകും...

ഒരു പാട്ട് കേൾക്കുമ്പോൾ

അത് പാടി പിന്നെയും

പ്രളയ സമാധിയിലമരും

പ്രളയ സമാധിയിലമരും ..