വിഷുപക്ഷി (2019)

 

കള്ളയുറക്കത്തിൽ

കണ്ണിമ തുറക്കാത്ത

മയക്കത്തിൽ 

ദൂരെയൊരു

പടക്കപ്പൊട്ട് കേൾക്കുന്നു .

പ്രതിധ്വനിയെന്നോണം 

തുടർ പൊട്ടലുകൾ .

അകായിലൊരു തിരി വെട്ടം

അമ്മയുണർന്നു .

പടിഞാറ്റയിൽ

നിറദീപങ്ങൾ തെളിഞ്ഞു .

ഇരുതേങ്ങയിൽ 

കൂർമ്പൻ ദീപം 

ഫലമൂലങ്ങൾ ..

പൂമുഖവാതിൽ കറകറ ശബ്ദം ..

"നോക്കൂ "

അമ്മയുടെ കൈ പിടിച്ചു പോവുന്ന

അച്ഛൻ .

അപ്പോഴിരുളും 

മേടക്കുളിരും 

തനിച്ചാവലും ...

എവിടെയോ ഒരു പനയോലപടക്ക പൊട്ടൽ ..

അമ്മേ ...

ഞാൻ കൺ തുറന്നിട്ടില്ല .

ഒന്നെന്നെ കണി കാണിക്കുമോ ??