ഒരു വിളി

 

ഉറക്കത്തിലൊരു വിളി കേട്ടുണർന്നു .

പരിചിത സ്വരമതിനൊരു യാചനാഭാവം 

ഒരു വിറയൽ, വിതുമ്പിയ ശബ്ദം .

ഓട്ടുപാത്രത്തിൽ ചിലമ്പൽ പോലൊരു

പഴക്കത്തിന്നലയൊലികൾ ...

പിടഞ്ഞുണർന്നേൻ ,ചെവിയോർത്തേൻ

നിശബ്ദം ഭൂമിയുറങ്ങുന്നു ശാന്തം .

പൂമുഖവാതിൽ തുറന്നു ,തൂവെളിച്ചം

പിൻനിലാവൊ ,തെരുവിളക്കോ !

കാതോർത്തു ,ഒരു വിളി കേട്ടുവോ !

തണുത്ത കാറ്റിന്നല, ഒരവ്യക്തഗന്ധം !

ഗന്ധമത് ചോരയുടെ ഗന്ധം !

ഞെട്ടിയൊന്നുകൂടിയുണർന്നു

മതിഭ്രമമകന്നെങ്കിലുമതേ വിളി

തന്നിലതേ യാചന ,വിറയൽ 

അതിരൂക്ഷമഴുകിയ ഗന്ധം !

തണുവാമിളം കാറ്റും ,വിളറും

വെളിച്ചവും ,രാവിന്നന്ത്യയാമവും

ഏകയായൊരു കിളിയുടെ മൂളലും

പിന്നിലുപേക്ഷിച്ചുറങ്ങുന്നു വീണ്ടും 

അകം തെളിഞ്ഞക്ഷമനായ് വീണ്ടു-

മൊരുറക്കത്തിനായൊരുങ്ങി ഞാൻ